洪永城啜爆黃翠如 蕭正楠冷笑誓爆陰毒

藝人洪永城、黃翠如、傅嘉莉（Kelly）及陳煒等昨日在將軍澳出席今晚首播的無綫劇集《我瞞結婚了》之「我瞞的婚禮」活動。

Tony在劇中不但與翠如BB隱婚，更搭上Kelly搞婚外情，名副其實左擁右抱，而他在會上亦一拖二出場，期間更半蹲讓翠如BB和Kelly坐大髀，盡享齊人之福。Tony又肆無忌憚孭起翠如BB，讓背脊「享受」對方胸壓，趁女友唐詩詠不在場就「胡作非為」，完全唔怕被扭耳仔。

熟人親熱打冷震

Tony與翠如BB在劇中「激咀連場」，兩人透露又要咀又要摑，翠如BB更笑指與對方拍親熱鏡頭時，因太熟而忍不住打冷震：「摑佢又唔敢用太大力，佢好易嬲，驚佢會投訴我！」被摑足三次的Tony笑言要在網上投訴。提到男友蕭正楠或會睇到眼火爆，問翠如BB會否叫他欣賞？她拍心口笑說：「全世界最令佢放心嘅男仔就係洪永城！」Tony聽罷亦有樣學樣，唔執輸說：「全世界最令詩詠放心嘅女仔就係翠如。（兩Pair人一齊睇劇？）都好喎，可以搵佢哋幫手谷收視！」

洪永城咁大膽孭起黃翠如，唔怕女友唐詩詠呷醋咩？

蕭正楠

打到Tony飛起

翠如BB雖說男友阿蕭放心，但記者事後問他對二人激咀可會「冇眼睇」？阿蕭竟「爆陰毒」還以顏色，並冷笑謂：「梗係想睇啦！睇吓佢兩個咀得有幾激烈囉！我仲好期待同唐詩詠快啲一齊拍戲，拍番同一樣嘅戲，畀番佢（Tony）睇！（想打佢？）使乜我打，喺劇中翠如都打到Tony飛起啦！不過呢啲都係戲嚟嘅，佢哋擦出嘅火花，希望可帶起套劇！」

至於提到Tony「情敵」馬國明情傾黃心穎，問是否放下心頭大石？Tony笑說：「佢從來唔係舊石，我都祝福佢哋嘅！」似乎一直不當對方是對手。不過，翠如BB卻向Tony潑冷水，抬高馬國明踩Tony說：「佢梗係唔係石，佢係神，級數高好多！」令Tony哭笑不得。

洪永城任由傅嘉莉與翠如坐大髀，享盡艷福。

幾對「新人」拉隊宣傳《我瞞結婚了》。

文：影視組