戴歷羅斯至young MVP

今季常規賽MVP由120名體育記者及評述員投票，球迷亦能夠參與其中，在網上投票後得出嘅結果，會當成1份選票。在121份選票中，戴歷羅斯獲得113張第一選票，並以1,182分壓倒性首奪MVP寶座。緊隨其後係杜域侯活，獲得3張第一選票共得643分。上屆得主勒邦占士雖然獲得4張第一選票，但分數卻不及「魔獸」，僅以522分奪第三，而高比拜仁及杜蘭特則分列第四及第五。據悉呢五位星中之星，將會同時入選今季常規賽最佳陣容。

「毒玫瑰」感謝阿媽支持

今次戴歷羅斯除以22歲之齡，成為史上最年輕MVP得主之外，同時亦係繼摩西馬龍之後，首位只係征戰NBA三季後就能奪得MVP寶座。「毒玫瑰」領獎後表示：「我要感謝上帝給予我天賦球技，感謝隊友、教練及球隊嘅工作人員，佢哋一路令我成長，但我最要感謝係媽咪，每當我遇上困難嘅時候都支持我，我現在還記起媽咪叫我起床訓練嘅情景，係你讓我不斷前進，我愛你！」

戴歷羅斯在今季常規賽平均攻入25分、7.7次助攻及4.1個籃板球，成為史上第七位球員能夠在單季同時造出25分、7.5次助攻及4個籃板球嘅威水數據。羅斯仔今季在得分及助攻數字都能殺入聯盟前十，公牛此前就只得「波神」米高佐敦在88至89球季做到，而今次亦係NBA史上第12次，最有價值球員及最佳教練均來自同一支球隊。

本報綜合報道