【本報綜合報道】在常規賽令人稍為失望嘅熱火，估唔到卻成為今季季後賽最穩定嘅球隊。熱火尋日憑「三巨頭」合共攻入80分，以102比91擊敗塞爾特人，保住頭兩場主場優勢，總成績領先2比0。
熱火「三巨頭」可謂主宰了賽事，勒邦占士轟入最高35分，另加7個籃板球，韋迪就貢獻28分及8個籃板球，而首戰低迷嘅保殊則交出「雙雙」17分及11個籃板球，「三巨頭」佔球隊接近八成得分。其實塞爾特人在第四節中段曾一度追平，但熱火在關鍵時刻打出了一段14比0攻勢，成功奠定勝局。
塞爾特人輸波之餘，最弊係大將皮雅斯及雷阿倫都在今場勇戰受傷，皮雅斯傷了左腳跟腱，而雷阿倫就被撞傷胸口。主帥李華士賽後更透露，另一主力朗度係帶住背傷上陣，綠軍傷兵滿營難免令人擔心。
另一方面，保殊日前已正式向法院提出起訴前女友，借佢名字參與《籃球太太團》真人騷。保殊希望對方作出賠償及禁止再借佢個名上位，而保殊亦承認兩人育有一子。