政情：病痛纏身 在囚趙家賢頻頻睇醫生
因去年協調民主派初選，涉嫌觸犯《港區國安法》以及被控串謀顛覆國家政權罪嘅東區區議會副主席趙家賢，一直都受到高血壓、糖尿、五十肩等健康問題嘅困擾，還押前後都頻頻進出醫院，最近又因為偏頭痛同視力問題，申請緊睇醫生喎。
向黨友呻牢飯難食
趙家賢嘅黨友前日到赤柱監獄完成探訪後話，第一眼就見到趙瘦咗好多，事關身體問題需按糖尿餐單進食，但趙就嫌啲米飯好難食。黨友又話趙嘅血壓已經回復正常水平，不過就持續有偏頭痛問題，左眼睇嘢都唔太清楚，容易有影，所以申請緊去睇眼科醫生。
其實，趙家賢未還押前，已經話自己嘅精神同健康狀況都欠佳，包括有高血壓、聽力差、集中能力弱等問題，喺東區醫院跟進病況。還押後情況更加嚴重，3月時有探監人士話趙家賢不但有耳朵受創嘅後遺症，仲有糖尿、五十肩等問題，當時身處監獄醫院，仲話佢個人明顯出現疲態喎。