中環出更：將軍澳25億工程獲批 議員憂配套不足
立法會財務委員會尋日通過至少3個工程項目，其中喺將軍澳公營房屋發展方面，將進行工地平整同埋基礎設施工程，涉款逾25億元。有議員關注區內嘅社區配套不足問題，希望政府可以檢視。
香港房屋供應問題緊張，唔少議員喺會上亦關注社區配套問題。議員容海恩就指魷魚灣邨以西嘅新用地將會有4幢新樓宇落成，但只有一座係福利同零售設施，擔心日後寶林邨商場出現老化，加埋魷魚灣邨新公屋居民，啲設施需求唔足以應付密集人口。
倡重新規劃交通
議員鄭松泰就認為，寶林邨有較多長者居住，而且該屋邨朝早嘅道路交通十分繁忙，覺得政府有需要喺交通配套嘅設計方面，再做新評估甚至係重新規劃。
面對議員嘅關注，運輸及房屋局總土木工程師（工務計劃）康榮傑就話該區除咗寶林邨商場，仲有新都城商場可以滿足居民需要，又話政府已搵咗顧問公司檢視居民需求，部分零售同埋社福設施係經顧問公司研究後而釐定興建。
土木工程拓展署土木工程處處長胡國源就話，預計魷魚灣邨公屋喺2030年落成，到時會加強行人過路設施，來往屋邨同埋寶林港鐵站。另外會上亦通過西九龍填海計劃同埋荃灣及葵涌鹹水供應系統改善工程，分別涉款3.3億元同埋近3.5億元。
卓妮