中環出更：舞台劇移師線上 鄭至芝帶來新體驗
接近一年嘅禁聚令，令到線上開會同授課成為港人生活嘅新常態，依家進展到舞台表演，都可以透過視像會議程式隔空進行。從事舞台藝術嘅傑青鄭至芝（Gigi），其所屬嘅劇團最近公演一個原創劇目，於劇院進行實體舞台演出嘅同時，又提供網上實時演出版本，為觀眾帶來另一種形式嘅觀劇體驗。
Gigi指疫情導致好多地方都未能正常通關，而居於澳門嘅劇團導演，無法以即日來回嘅方式到香港參與舞台排練，於是佢哋就喺排練場地放置多角度鏡頭，然後透過視像會議程式，予導演遙距指導，後來劇團發覺，何不照辦煮碗，向觀眾提供線上觀劇嘅選擇呢？不過要落實構思就要面對棘手問題，原來劇團嘅場地夥伴─上環文娛中心劇院裏面並無WiFi信號，儘管有電訊供應商提供解決方案，然而索價過萬嘅月費令劇團望而卻步，但幸好劇團想到另一方法，就係租用一個接收器，將5G信號轉化為劇院裏面嘅WiFi。為咗配合劇情，以及容許觀眾自由選擇不同角度嘅畫面，劇團亦需重新設計舞台布景。
陳嘉賢：虛擬時裝表演畫面強烈
除咗舞台藝術，時裝表演亦由線下走到線上。香港工業總會副主席陳嘉賢（Karen）近年進軍時裝界，佢旗下嘅長衫品牌於去年9月參與時裝界盛事CENTRESTAGE，不過觀眾如雲嘅時裝表演就改用虛擬形式，做法係先由時裝模特兒於綠幕前面行天橋，錄影之後再配上不同主題嘅特技效果，繼而按程序表於社交平台播出。Karen話時裝表演，現場觀賞無疑係較有氣氛，但虛擬時裝表演所展現嘅嶄新視角，以及別具匠心嘅後期處理，都令到畫面流露強烈嘅視覺效果。
有二胡王子之稱嘅王憓，日前就到中環大會堂為一個音樂會擔任表演嘉賓，名媛趙曾學韞都有去捧場。對於使用視像會議程式直播演出，王憓有所保留，理由係擔心直播會令到音色打折扣，如果真係要進行線上音樂會的話，佢寧可選擇使用錄影，繼而透過串流媒體供知音人欣賞。
卓妮