中環出更：疫轉經濟 史立德盼中港早日通關
辛丑牛年伊始，本港仍受疫情困擾，中華廠商聯合會都惟有改為網上團拜。會長史立德（Allen）仲同一眾副會長一齊又唱又跳，拍片唱賀年歌，每一位把聲都聽得好清楚，絕對唔係咪嘴o架！Allen稱雖然香港經濟出現有史以嚟最嚴重嘅衰退，但留意到市民逐漸接受同疫情同存，相信香港經歷完低潮後，總會否極泰來，今年經濟有望復甦嘅！
Allen話疫情下好多商人返唔到內地管理廠務，非常棘手，希望中港兩地可以盡快通關。Allen又話雖然去年年尾嘅線上工展會頗為成功，但廠商會仍然會努力探討同爭取喺今年年尾舉辦實體工展會，到時會有線上線下兩個工展會，實行雙管齊下，為業界提供嶄新嘅營銷環境，更有望打入內地市場。
梁兆賢籲投資者保持謹慎
至於廠商會副會長梁兆賢（Jackson）展望經濟情況就話要睇定啲。佢認為市道蕭條已經引發企業結業潮，令工商舖物業需求同售價都跌到谷底，不過住宅樓市就相當硬淨、冇乜大跌。Jackson預計今年樓價難以出現大幅調整嘅情況，之不過失業率可能會惡化，提醒市民最好係量力而為。Jackson又話經濟同跨境活動要一段時間先可以完全恢復，內地資金未必咁快重臨香港樓市，所以投資者都要保持謹慎。
另一位廠商會副會長陳家偉（Calvin）提到各項社交距離措施仍然實施，企業經濟情況可以話係相當嚴峻，農曆新年過後或者會出現大規模結業潮，認同失業率仍然未見頂，預計今年嘅失業率恐怕會維持喺6%以上嘅水平添。以致今年畢業嘅同學仔比起佢哋嘅前輩更難搵工，難免感到迷惘。不過Calvin話部分行業，例如製造業、貿易業等失業率有回落迹象，加上香港正加速推進創科發展同再工業化，相信前景唔會太灰，建議畢業生不妨加入呢啲行業，或者會為自己開拓一條意想不到嘅出路。
卓妮