中環出更：葛珮帆提草案 冀遏瀕危物種走私
有瀕危物種遭不法分子作牟利用途，但本港相關條例成效未見顯著，令非法活動日益猖獗。議員葛珮帆（EQ）斥政府喺2018年修訂嘅《保護瀕危動植物物種條例》，儘管令人產生阻嚇走私瀕危物種嘅期望，但過去兩年嘅走私緝獲量持續飆升，反映條例未能有效阻止非法活動。有見及此，佢將會提交議員法案，希望賦予執法機構更多權力，遏止跨國犯罪集團利用香港走私野生動植物。
倡賦予執法機構更多權力
EQ話前年被緝獲嘅野生動植物價值就高達1.34億港元，過去兩年嘅走私緝獲量更加係持續飆升，從而凸顯修例嘅罰則、賦予調查同執法人員嘅權力，都對犯罪集團欠缺有效阻嚇力。另外，佢話落網嘅罪犯往往只係負責運送貨物，並非緝捕統籌同策劃嘅有組織犯罪集團，導致相關嘅違法活動日益猖獗。
為咗增加執法人員嘅調查權力，同賦予執法機構更多權力，以遏止同類事件繼續發生，EQ擬向立法會提交議員法案，將部分《保護瀕危動植物物種條例》所訂嘅罪行加入《有組織及嚴重罪行條例》中，以加大涵蓋範圍。佢仲話已經備妥法案草擬本同資料摘要，開展提交議員法案嘅程序，尋日已獲環境事務委員會批准，將於下月向委員作諮詢，希望獲得委員同政府支持修例，以更有效打擊野生動植物罪行，並向國際社會表明香港打擊呢類罪行嘅決心。
卓妮