政情：誕女後減50磅 容海恩着旗袍賀佳節
尋日係年初三兼情人節，議員容海恩（Eunice）就喺Facebook上載咗一張充滿新春節日氣氛嘅相片（圖），祝大家情人節快樂。相中嘅Eunice身穿紅色旗袍，企喺一棵桃花樹旁，唔少網民大讚佢好靚女啊！之但係，上年誕第二胎嘅Eunice雖然已減咗近50磅，但似乎唔係好滿意自己身材，笑言自己「仲有啲肚腩仔」，要繼續收身喎。
已經係兩個囡囡媽咪嘅Eunice話，對上一次着起呢件旗袍已經係2016年，自從前年同上年生咗囡囡後，完全唔敢拎番件旗袍出嚟。佢話上年體重最高峰時期曾增加至170磅，經過一年時間依家終於瘦番去120幾磅。被問到有咩收身秘訣時，佢就話平時工作比較忙，較多時間要落區，自己都好少做運動，但生完二女後飲食回復清淡，食少咗甜品同雪糕，仲話夜晚要盡量食番少啲飯喎。
丈夫袁彌昌亦有份讚好
該貼文唔單止得到一班網民大讚靚女，原來佢老公袁彌昌（Derek）都有份讚好喎！Eunice話上載貼文後第一時間就問佢like（讚好）咗未，又話對方見到張相都話「Okay，都接受到」，笑指今日係情人節，Derek對張相梗係要講滿意，唔敢搵嘢刺激佢喇！之但係，農曆新年期間同家人聚會的話，都難免會食多咗嘢，Eunice就話聽日開始已經排滿工作，難得過新年，當然要趁假期陪家人食多啲嘢咁話。