政情：媒體美化暴力 陳健波促強硬處理
美國國會山莊早前遭大批示威者闖入。保險界議員陳健波（波哥）就話，事件令人感受最深嘅就係，美國對暴力絕不容忍，舉例話有公司認出職員有份參與暴力示威就立即開除，同香港社會喺反修例風波中容忍暴力嘅態度簡直就係差天共地呀！
教育司法都需改革
波哥話國會山莊事件雖不幸有人命傷亡，但彼邦完全冇人提及香港大學法律系副教授戴耀廷所倡議嘅「違法達義」，媒體亦都一直口誅筆伐、強力譴責暴力。反觀香港，唔少媒體美化暴力之餘，仲批評警方執法，甚至提出要政府特赦示威者添。另外，佢話衝入美國國會山莊嘅都係三、四十歲嘅成年人，而香港反修例示威中就屢次有12、13歲嘅人士被捕，批評香港教育制度出現問題。
佢將香港同美國處理示威者暴力行為嘅手法作比較後，話港府最錯嘅就係冇強硬處理，依家排期審議反修例案件都要等幾個月。另一方面，學校有示威者叫口號，校方都唔敢處理。佢話美國就示範畀大家睇，乜嘢叫不可藉民主之名行使暴力，仲強調話香港教育、媒體、司法制度都需要改革，先可以搵番多年前守法、有禮、安全嘅香港喎。