中環出更：美容天后曾裕推美容院Q嘜 提升業界形象
唔少人都有幫襯美容院嘅經歷，但係美容院同消費者屢傳糾紛，令業界始終擺脫唔到負面形象。「美容天后」曾裕（Joyce）有份發起嘅香港美容從業聯會（聯會）早前舉行第一屆就職典禮，Joyce話，為咗提高業界服務質素及形象，佢哋正籌備推出美容院Q嘜，即「優質美容商戶認證計劃」，以提高消費者嘅信心。
Joyce話，香港有六千幾間美容院，希望Q嘜計劃可以成為正規美容院嘅金漆招牌。聯會亦將成立美容行業調解中心，以解決業界同顧客間嘅爭拗。日後消費者若有索償，經裁決後亦可由行業保險中撥付。除咗創會主席曾裕之外，聯會發起人仲有創會副主席謝欣玲、陳映彤及李守義。
新界社團聯會理事長陳勇、立法會議員梁志祥都有到場。講起扮靚，陳勇話有次去韓國國會交流，見到班男議員化行妝開會，現場仲有直播，佢以為拍緊韓劇，後來先知班議員係真嘅。佢笑稱香港啲議員不妨試吓化妝，或者個人望落靚啲，好多嘢都容易傾啲，議會氣氛就唔使咁緊張喇。
梁志祥為選舉做Facial
梁志祥就話，去年立法會選舉期間佢都有做Facial，做完真係白淨啲、精神啲。佢唔使幫襯美容院，由老婆大人幫佢做，因為祥嫂未嫁畀佢前係做美容嘅。不過佢只做咗兩次，選完就偷懶喇。至於化妝，佢話咪搞喎！
講開韓風，韓國美容護膚品一度席捲亞洲，不過國際美業評審總會創會會長朱雯迪話，呢股韓風真係似一陣風，自從中韓關係變淡之後，唔少斥資起廠打算大展拳腳嘅行家都謝晒，好彩佢一直堅持做歐洲美容品牌咋。
卓妮