新冠肺炎疫情喺本港持續一年，政府多次被狠批抗疫慢10拍，而經常甩轆而被炮轟嘅食物及衞生局局長陳肇始，前日被發現冇掛上證件出入「受限區域」，尋日佢就終於醒水，識得掛番個證件先自由出入喇！
政府前日指明佐敦部分地方為「受限區域」，陳肇始聯同其他官員落去視察時就唔記得掛證件，唔單止畀駐守嘅警署警長截停，仲要其他官員幫口解圍先獲放行。事隔一日後，佢先識得掛番證件「自出自入」，連咁簡單嘅事都要隔咁耐先識，難怪佢連抗疫都搞到慢半拍啦！
