政情：蔣麗芸專家口脗 捉食衞局醫管局公審

政府專家顧問、香港大學微生物學系講座教授袁國勇，早前到瑪嘉烈醫院視察情況之後表示，相信係由於確診病人曾經除口罩食飯，令病毒經空氣傳播。不過議員蔣麗芸（Ann姐）就對袁嘅講法有保留，尋日Ann姐喺社交網站發文，話大家都知最多新冠病毒嘅地方就係醫院，而病人食飯時當然要除口罩，批評袁嘅講法係轉移焦點，將責任推卸到病人身上。

口罩最低級別 眼罩面罩唔夠分

提起口罩，港人經過將近一年嘅抗疫，好多市民都可以有充足嘅口罩儲備，有人更可以日日換唔同款式添，反觀醫護人員嘅情況就好唔同喇。Ann姐話接獲好多醫護嘅反映，指佩戴嘅外科口罩多數係屬於最低嘅級別，而眼罩同面罩就因為供應不足，仲要額外申請添。Ann姐直言市民就話可以避，頂多係出少啲街，開少幾次party，之不過醫護人員則避無可避，好多時仲要「埋身」照顧病人。最近有部分確診個案都係出院嘅病人，引致社區爆發，Ann姐認為須要求病人入院以及出院前都進行病毒檢測，以確保萬無一失。

今次瑪嘉烈醫院出現小型爆發，Ann姐直指食衞局同醫管局係責無旁貸，促請政府盡快提升醫護人員嘅保護裝備；向醫護提供定期嘅病毒檢測；若然醫護人員認為自身有需要，應該容許佢哋即刻進行檢測，呢啲先至係真正對焦嘅解決方法，又認為兩局嘅高層有必要去立法會解釋醫院爆疫一事，講明一定會「鋤佢哋」啊！睇嚟食衞局局長陳肇始同醫管局行政總裁高拔陞都走唔甩，要解畫嘞！

斥港府缺危機意識 搵商家開刀

Ann姐批評港府缺乏危機處理意識，話之前三催四請要政府搵指定酒店畀入境人士隔離，一直口口聲聲話搵唔到，之後咪又係搵到大量酒店，講到尾都係在於肯唔肯做嘅問題啊。而臨近農曆新年，Ann姐認為確診個案若保持高企，政府就應該禁止私人處所舉行跨家庭嘅聚會。對於食衞局局長陳肇始尋日話，有需要嗰陣會探討規管家居內嘅家庭聚會，之不過就話社會有唔同聲音，認為連家居活動都要管係太嚴厲。Ann姐講到呢度就火都嚟，話依家關乎生死同全港嘅經濟命脈，批評政府最叻就係搵小商家開刀，但佢哋正係僱用好多基層市民，覺得政府抗疫工作要分緩急輕重，果斷啲囉！