中環出更：建築署擺烏龍 立會閘機玻璃漏巨罅
前年反修例示威中有示威者闖入立法會大樓大肆破壞，立法會其後加強保安。近日就喺地下嘅議員入口加裝閘機以及玻璃門，但塊玻璃就唔係好啱尺寸，竟然有大大條「罅」喺度，保安能力唔係好掂咁喎。
解釋非度身訂造致尺寸有誤
本報記者尋日見到閘機嘅玻璃門雖則有一個人咁高，但闊度就似乎唔多足夠，門同門之間仍然有好大嘅空位，足夠一個成年人側身通過。據知情人士話安裝閘機嘅工程由政府建築署負責，前幾日開始安裝時立法會秘書處已經發現尺寸唔啱，建築署解釋閘機同玻璃門都係原裝部件，並非度身訂造，所以咪擺咗咁大個烏龍囉！
據了解，暫時有兩個補救方案，第一就係將玻璃換大塊啲，可以密封空位，不過就要考慮到部閘機可唔可以承受到；第二個方案就快啲同平啲，就係搵其他物料封咗條罅！至於幾時可以完成補救工程，消息人士話未有確實時間，但佢哋會密切跟進咁話囉。至於要再裝過或補「罅」嘅費用，由邊個負責先？聽聞係政府當局負責喎。
卓妮