政情：公民講場：運房局話整唔整 公屋喉管任播毒

第4波疫情爆發，發現多宗個案懷疑係經大廈喉管傳播，令人質疑因為政府懶懶閒兼走數惹禍。有政黨尋日翻政府舊帳，話房委會喺舊年年中應承全面檢查全港公屋嘅喉管，但一直冇行動時間表，又鬧爆房屋署維修排水渠嘅個案。話時話，冇行動時間表，即係冇郁過喇，身兼房委會主席嘅運輸及房屋局局長陳帆講嘅嘢唔算數喇！老實講，政府被鬧爆抗疫無能，若果任由喉管播毒，陳帆都走唔甩要被問責。