政情：民協冇人「老」虎焗戰九西
民協立法會議員馮檢基前年競選立法會超級區議會議席時，曾經豪言要衝出九龍西，仲搵來副主席譚國僑參選佢原本嘅九龍西議席，諗住如果好彩連中兩元，就可打破「一人黨」嘅宿命，可惜事與願違，譚國僑保唔住阿基個九龍西議席，仲敲響支持者流失嘅警鐘。下屆區議會同立法會選舉明年起相繼殺到，阿基想搵接班人保住民協呢個老字號，但結果一波三折，更因為青黃不接，焗住要「老」虎仔廖成利出戰。
工記勢洶 區選存暗湧
據聞阿基一直好心急搵接班人，等民協可以擴大聲勢，唔使得佢自己一個喺立法會唱獨腳戲。不過，阿基連下屆贏唔贏到區議會選舉都係未知之數，事關想當年阿基喺麗閣選區只係以五百多票擊敗工聯會范國輝，如今工聯會改派新人林偉文應戰，仲指明要搶走阿基嘅議席，阿基能否成功連任仲有暗湧。萬一阿基失「守」，就連立法會超級區議會入場券都攞唔到，到時分分鐘要返番九龍西參選。
「超級」大競爭 恐靠邊站
雖然阿基喺今屆選舉得票唔低，但唔好唔記得佢嘅泛民主派對手就只有民主黨，喺分餅仔下可以話仲有機會。不過，上次冇派人出選嘅公民黨同工黨都考慮緊派人挑戰超級區議會議席，如果兩黨到時決定參選，而二○一六年立法會選舉方面又原地踏步，阿基分分鐘要靠邊站，甚至被人搶走議席。
最後民協面對青黃不接亦都係個不爭嘅事實，經過上次立法會選舉嘅經驗，譚國僑同中途退選嘅廖成利似乎幫個黨吸唔到幾多票，多年來力捧嘅莫嘉嫻又因為生第二胎而暫時退下火線，下屆會唔會接力參選立法會仍然係未知之數。雖然廖成利早前揚言要接手參選九龍西，仲自比「山貓」，以消滅西九新動力梁美芬呢個「鼠王芬」為己任，但有幾大勝算就不得而知喇。如果民協再唔銳意推行年輕化，「亡黨」真係遲早嘅事，或被其他黨派吞併。