政情：疫下五度返內地 陳思靜變隔離達人
因全球都爆發新冠肺炎疫情，港人即使去海外抑或返內地工作、讀書都要先進行隔離。元朗前區議員陳思靜早前就要返內地，前前後後加埋成五次，隔離咗70日添，難怪被啱啱先喺內地完成隔離嘅公民力量主席潘國山稱為「隔離達人」啦！
潘國山：掃二維碼方便追蹤
陳思靜嗰5次隔離係連埋喺香港嘅家居隔離，仲自嘲「虛度咗6分1年喇」。佢透露，疫情爆發後佢第一次返內地係5月份，當時內地出入已經唔使戴口罩，喺公共場所就要先探熱。潘國山最近喺內地完成咗14日隔離，佢就話搭地鐵就要戴口罩，而且地鐵內仲有二維碼可以掃一掃，證明行蹤。陳思靜認為咁樣處理就可以一次過搵到晒啲緊密接觸者，所以內地可以咁快清零。
至於喺內地經歷過7日隔離同埋7日家居隔離嘅沙田前區議員黃宇翰就話喺酒店隔離咗7日後，就搭專車返去小區，仲要一落車就有着保護制服嘅工作人員送到門口，喺佢屋企門口仲會有閉路電視添！佢仲話有次出去掉垃圾時唔記得戴口罩，即刻就收到電話問佢做乜出嚟，嚴謹到佢都話基本上唔使諗逃走。不過，佢就提醒，話喺小區隔離後要再去蘇州，點知因為小區唔記得幫佢上報，結果個健康碼未轉番綠色，幾驚上唔到機，真係驚險喇！