政情：周庭升甲級犯 轉囚大欖女懲教所
近年唔少政治人物入獄，前香港眾志成員周庭早前承認，喺前年6月21日參與及煽惑包圍灣仔警察總部嘅未經批准集結，被判監10個月。周庭隨後喺羅湖懲教所服刑，但有指早前周庭被「升級」為甲類犯人，甚至轉往大欖女懲教所服刑，而南區區議員袁嘉蔚亦證實有關安排。有資深懲教人員估計，可能係周庭入獄後，仍透過探訪宣傳獄中生活，猶如「做真人騷」，延續對外界嘅影響力。
被指宣揚獄中生活 凝聚勢力
唔單止係延續影響力，該資深懲教人員亦解釋，話周庭會間接吸引其他喺獄中嘅追隨者，凝聚其勢力，所以將周庭嘅保安級別升為甲級，係為減低其影響力同埋保安考慮，同埋方便管理。而且過往亦都有類似情況，例如部分有勢力同埋影響力嘅囚犯，即使刑期較短都會安排喺甲級倉處理。
周庭入獄後，其影片頻道仍繼續有上載唔同影片，例如袁嘉蔚早前帶同書本、畫冊等物品去探佢，並轉述周庭喺獄中嘅生活，例如佢覺得好凍，要着成7件衫、被編配到洗衣房嘅生活同埋報咗蛋糕班等。