政情：新界東交通塞到嘔 陳帆話之你齋諗起樓

新界西北鐵路發展亦被轟滯後

WK喺Facebook貼文中話新界西交通道路規劃，屯赤隧道通車固然係好消息，但為應付新界西北發展，好多人希望11號幹線可以盡早通車。其後我哋向WK查詢，話無論係11號幹線定係屯門繞道，運房局都話研究緊，其中11號幹線經過多年討論，都預料要2036年先通車。佢直言十幾年後先通車實在太耐喇，仲批評新界西北嘅鐵路發展更加係滯後，舉例話政府指東涌西延線都要2029年先開通，反問咁市民喺呢幾年出行嘅時候可以點呢？

新界西交通問題已經令人頭痕，點知新界東仲大鑊喎。WK曾向陳帆指出，新界西道路改善有望，但新界東就令人失望！點解咁講呢？WK話隨着古洞北、粉嶺北嘅新發展，單靠依家已經非常擠塞嘅吐露港公路，遲早都不勝負荷。佢話新界東蹉跎好耐，但局方就冇諗過起多條公路，反而成日話要喺新界東北覓地建屋，但又忽視當地嘅交通配套問題喎。

目前問題未解決 空談跨越2030

既然新界西都有改善交通嘅計劃，咁新界東會唔會都有類似嘅方案呢？WK直言「新界東連概念方案都冇呀，仲慘過新界西！」佢話陳帆成日話要進行整體策略性嘅交通研究，先前仲話「跨越2030年的鐵路策略性研究」同埋「跨越2030年的主要幹道策略性研究」，會研究埋新界東交通問題。之不過，WK批評陳帆對2030年前嘅道路問題都未解決，既然依家都已經拖慢晒，到時又點「跨越」呢？

其實政府早喺《鐵路發展策略2014》提出興建嘅北環線，就係用嚟配合新界東北發展項目。運房局早前話第一期嘅主要功能係滿足古洞北新發展區嘅運輸需求，來往該發展區至上水站；至於第二期屬北環線主線，會喺新界同九龍形成一個環狀鐵路，預料可改善新界東同新界西之間嘅運輸連接。但政府預料北環線總造價高達620億元，第一期料2023年動工、2027年竣工，預料第二期更加要喺2034年先完工添！真係等到頸都長呀！