政情：識穿𠜎雞「騙徒」身份 區議員冇落疊
騙徒手法層出不窮，為求呃人真係可以無所不用其極！葵青區議員梁志成日前就喺Facebook（Fb）發貼文，話收到該區區議會主席單仲偕（𠜎雞）嘅WhatsApp訊息，疑似𠜎雞就形容自己有一個親戚喺內地做緊手術，但手頭上唔夠錢，要求梁將幾萬蚊入去一個內地銀行戶口喎。
「單仲偕」迅即變身「鄺葆賢」
梁志成Fb仲貼出佢同疑似𠜎雞之間嘅對話，就話見到對方當時係使用緊𠜎雞嘅相做頭像。喺佢哋嘅對話入面，疑似𠜎雞就叫梁匯3萬人民幣去一個王姓嘅內地戶口，又話去找換店匯錢快過去銀行，仲畀咗一個深圳嘅住宅地址，話係收款人嘅地址喎。
梁就話，自己一早就知呢啲係電話行騙，但都好有耐性咁同佢磨咗半日，仲話最後疑似𠜎雞見勢色唔對，就即刻刪除咗WhatsApp頭像添！之不過，東網記者尋日下午根據梁披露嘅電話號碼，發現疑似𠜎雞今次就變成九龍城區議員鄺葆賢，換咗鄺嘅相做將頭像，相信鄺好可能會成為下一位「騙徒」喇！