政情：體藝界水深火熱 馬逢國鬧爆港府
政府前後推出多輪防疫抗疫措施同埋基金，旨在支援受疫情影響嘅人士，但抗疫基金經常被批評「救啲唔救啲、補極都漏！」體育、演藝、文化及出版界議員馬逢國尋日喺社交平台發文，痛斥政府未有擴大第4輪抗疫基金資助範圍，搞到好多行業仲係未能受惠呀！
抗疫基金資助範圍窄
馬逢國喺Facebook發文話，第4輪基金大部分項目，都係沿用過去3輪基金定下嘅申請準則，被遺忘嘅業界從業員同埋團體始終未能受惠，受書展取消而大受打擊嘅出版界亦冇任何支援。
我哋向馬逢國查詢，佢話粗略估計體育、演藝、文化及出版界加埋有約10萬名自僱嘅從業員，但好多人唔係港協奧委會屬下總會教練，唔符合資格申請抗疫基金嘅資助。佢隨即鬧爆政府對呢批從業員嘅苦況視而不見，仲話政府雖然唔知行業有幾多人，但又從來都唔去搞清楚囉！
業界內冇工開嘅從業員，拎唔到政府資助可以點？馬逢國就話部分人選擇去送外賣、洗車頂住先，仲有啲人連兼職都搵唔到，惟有每日坐喺屋企數手指。佢話無論點反映業界苦況政府都唔採納，真係冇晒辦法呀！