政情：陳智遠為民所急：九龍公廁少過港島
食物及衞生局前政治助理陳智遠（Paul），離開「熱廚房」後主力發展文化深度遊。佢尋日就喺Facebook發貼文，提到自己喺上月底曾經向多位廁所專家「廁教」，仲大談自己好鍾意嘅「公廁」話題。Paul就話自己做資料搜集時發現，明明九龍人口比港島多，但九龍區嘅公廁竟然少過港島區喎！
Paul就話，原來喺港島區有88個食物環境衞生署轄下嘅公廁，但喺九龍區就只有60幾個。翻查食環署網站上嘅資料，港島區最新公廁數目為91個，而九龍區就有62個，但當中有超過一成目前係正暫停運作。其實唔少人出街時都好難搵到廁所，睇嚟政府都要研究吓點樣提供多啲廁所畀市民使用喇。
而「清潔龍阿德」前日亦喺Fb發貼文，形容翻新之後食環署山頂凌霄閣公廁係「頂級公廁」，唔單止設施齊全，廁所入面仲有壁畫添。之不過，查實本港絕大部分公廁都係「甩皮甩骨」，該署仲被審計署鬧爆翻新得太慢，希望該署唔好淨係掛住呃like，快啲翻新埋其他公廁喇！