中環出更：新冠疫苗安全成疑 梁志祥倡接種派$5000

祥哥話社會上有人對新冠肺炎疫苗嘅安全性產生疑慮，認為政府有必要加強宣傳，話畀公眾知疫苗係安全，同時減低感染風險。如果提供埋獎勵，可以鼓勵人云亦云嘅市民接種疫苗。佢話吸取全民派發一萬元嘅經驗，運作上應該唔算困難，市民接種疫苗嘅時候填寫表格就可以。

轟政府抗疫唔湯唔水

祥哥又對政府抗疫工作不力感到失望，形容係「唔湯唔水」，指防控措施做得夠好的話，就唔會爆發第4波疫情。佢又大讚澳門同台灣嘅抗疫工作做得好好，完全可以堵截外來感染源頭，反觀香港出現第4波係因為有輸入個案，再喺社區爆發，演變成本地個案，政府睇唔到重點，只可以「頭痛醫頭，腳痛醫腳」，就算疲於奔命都解決唔到問題。佢又認為除咗向直接受影響嘅行業提供支援外，亦應支援運輸等其他相關行業，否則的話失業率會上升，影響社會穩定。

至於是否同意推行強制性全民檢測，祥哥就話比較難實行。

卓妮