中環出更：外遊無望 沈豪傑下白泥睇日落
旅遊氣泡成泡影，巿民外遊無望，惟有紛紛尋找本地遊嘅好去處。元朗區議員沈豪傑早幾日就去咗下白泥睇日落，話郊外地區人煙稀少中招風險較低，但都提醒市民要記得做好防疫措施，先至好出街玩呀。
但點解會諗起去下白泥呢？沈豪傑話本身係諗住去睇清末革命運動相關嘅元朗下白泥碉堡，但礙於時間有限，睇完日落就走咗喇。佢又話香港其實好多古蹟、農莊等地值得一遊，但疫情爆發之前，好多市民都選擇去日本或者內地旅遊，而忽略咗18區嘅特色景點啫。被問到之後仲會去邊度玩？沈就話都會考慮去大棠睇紅葉，但眼見疫情之下竟遊人如鯽，以致佢都驚咗，惟有等人潮疏落嘅時候再去遊覽喇。
甄韋喬一家去大棠打卡
有人選擇遲啲先去睇紅葉，亦都有人先睹為快。願景基金會主席甄韋喬日前同3個仔、以及孫女一齊去咗大棠睇紅葉，話咁大個人第一次去睇火赤嫣紅嘅楓葉，都忍唔住拉低口罩影張相，但絕大部分時間都戴好嘅。佢話去睇紅葉嘅時候真係好多人，為咗減低染疫風險都盡量避免喺人多駐足嘅地方停留，睇完紅葉之後都會約埋家人喺屋企聚會添。對於疫情導致冇地方可以去玩，佢話只要家人身體健康，都別無所求喇！
另外，食物及衞生局前政治助理陳智遠就避開人多嘅地方，去咗皇都戲院大廈度影相。佢喺社交平台發文話，過去兩個月生活同工作都好忙，話皇都本身都係香港保育中重要嘅案例，又祝呢幢建築物生日快樂，因為1952年12月11日係璇宮戲院正式開幕嘅大日子，而璇宮戲院亦即後來嘅皇都戲院。儘管又大一歲，但由於皇都戲院已確認得到保留並於6年後重獲新生，因此佢希望皇都可以長命百歲咁話。
卓妮