政情：區議會條例甩轆 徐英偉踢極唔郁
前議員及身兼中西區區議員許智峯早前棄保潛逃，同家人流亡英國，觸發外界關注其區議員議席嘅問題。其中有團體認為許有違議員基本道德，應知廉恥主動辭職，仲建議政府修訂《區議會條例》，一旦區議員缺席會議同埋表明離港時就即時喪失區議員資格。之不過，民政事務局就似乎「慢半拍」，未有就建議提供更多資料。之不過依家都有唔少區議員有案在身，睇嚟作為民政局局長嘅徐英偉要諗吓計喇！
團體「議會監察」尋日開咗個記者會，其中團體召集人、中西區區議會前副主席陳學鋒認為，依家嘅《區議會條例》明顯存有漏洞，覺得未能處理許智峯嘅情況感不理想，又話外界觀感就如「佢冇返工仲要出糧？」，將議員利益放最前，但市民利益就被放喺最後。對於依家峯鴿冇糧出，陳學鋒就覺得依家只係唔出糧住，相信政府要等佢返香港解釋清楚先再決定。
團體促修例 民政局：無資料提供
依家區議員可享月薪逾3.5萬港元，每月雜項開支津貼7,940元，並可享每年營運開支償還款額逾55萬港元，及每年醫療津貼逾3.5萬元等。喺許智峯本月初宣布流亡後，社會上已有聲音批評佢仍「白「逗」區議員人工」，要求當局即時褫奪其議席及停止發放任何薪津。不過民政局就要等人「踢一腳」先肯做嘢，拖到去前日先宣布有需要暫停發放許在12月3日或之後的酬金、津貼和開支償還款額，以確保有關安排符合指引及公帑得以妥善運用。
至於會唔會考慮團體建議修例呢？民政局就話對修例暫時未有更多嘅資料提供，只係重申已經暫停發放許智峯在十二月三日或之後的酬金，又對許智峯的不負責任行為深表遺憾。
攬炒派被指當區會係提款機
另外團體成員之一、西貢區社區主任溫啟明批評，「攬炒派」區議員將區議會當成「提款機」，透過不同團體申領區議會撥款，實行明益「自己友」。佢哋建議政府應收回區議會「社區參與計劃」撥款嘅主動權，避免再有「明益自己人」嘅情況發生，又要修改《區議會條例》規管依家區議會存在嘅問題並完善地區諮詢架構。
之不過，民政事務總署尋日澄清話冇意圖打壓區議會，又話發現部分「社區參與計劃」嘅撥款申請以抗疫為名，但涉及利益衝突，未能符合相關撥款守則，仲舉例指有團體向5個區議會提交合共超過4百萬嘅有關抗疫項目撥款申請，仲得到部分區議會同意通過，但該團體嘅負責人喺一月提出申請時，正受聘於一位區議員，而涉事區議員同埋該名負責人喺審核申請時都冇作利益申報，所以當局暫停批准同埋處理有關團體喺「社區參與計劃」下嘅批款項目，並要求各區議會就着有關團體嘅所有申請重新作出申報。