政情：大歎鐵板燒 商經局慶功？

灣仔會展中心一間日式鐵板燒餐廳尋日中午聚集咗一班官員，睇真啲原來係商務及經濟發展局局長蘇錦樑（Greg蘇）同幾位同事去開餐，大歎鐵板雪花牛肉，個樣不知幾梳乎，唔通因為香港電視網絡「收皮」，商經局要擦餐勁嘅當慶功？Greg蘇話當然唔係啦，因為佢知道呢間日本餐廳好出名，眼見同事們忙到好辛苦，所以諗住請幾位同事食餐鐵板燒，當做慰勞吓喎。座上客除咗Greg蘇、新聞秘書及一位同事外，仲有做新郎哥無耐嘅政治助理陳百里，眾人食得非常開懷，似乎真係好似打勝仗咁款囉！