中環出更：工程界男多女少 何臻言：有父母怕個女畀人溶咗
時代不斷進步，但社會仍存有性別定型，之但係正所謂「巾幗不讓鬚眉」，新時代女性都希望證明自己嘅能力同男性無異。工程及科技學會香港分會副會長何臻言（Justina）出身於工程世家，但同樣係工程師嘅爸爸不停強調工程師工作好辛苦，力勸個女唔好入行，但Justina好堅持自己有能力應付。
卓妮早前出席學會舉辦嘅傑出女青年工程師獎，現場見到房屋署前副署長馮宜萱同Justina傾偈。Justina話以前工地環境惡劣，明白爸爸會心痛個女捱苦，甚至知道有家長擔心個女入行，會畀男仔「溶咗」。佢讀書時期修讀電腦系，笑言自己曾幾何時都係一個「毒女」，當時班中都有三成係女性，比例都唔係特別懸殊，以為隨住時間過去，會有愈嚟愈多女性加入，但事實上比例冇乜大進步，佢對此感到可惜，希望可以擴大工程界中嘅「姊妹淘」。不過，佢話都有好處嘅，因為「物以罕為貴」，個個都會錫住女性嘅工程師。
蕭顯婷：日曬雨淋膚色變黑
其中一位傑出女青年工程師獎得獎者蕭顯婷（Jaimi）周不時都要去工地工作，即使係女性都一樣要日曬雨淋，Jaimi仲講笑話覺得自己因而膚色比較黑黝。佢話平時去戶外工作都會帶定雨褸，但有次去停機坪工作，見到風和日麗就一時鬆懈，點知天色一變突然落下滂沱大雨，但佢為免拖延項目進度，都堅持繼續手頭上嘅工作，返到辦公室先發覺全身濕透。
另一位得獎者江穎敏（Samantha）小學至中學都係就讀女校，即使大學修讀工程，亦冇特別期待可以認識更多男性，佢話要專心學習呀！Samantha仲話一直習慣被女性包圍，亦傾向同女性共事，覺得女性應團結一致證明自己嘅力量！Samantha認為女性作為工程師，優勢遠比劣勢多，例如工程師需要研究大量圖則，女性就有耐性得多喇！佢仲話女性嘅溝通能力亦較高，善於觀察其他人嘅眉頭眼額，開會都容易啲喇！卓妮