政情：禁聚令係咪玩針對 尹兆堅何君堯互罵
立法會尋日繼續延展政府防疫規例修訂期限嘅擬議決議案，多名泛民議員質疑禁聚令「玩針對」，係執法部門打壓「黃色經濟圈」嘅手段。不過議員何君堯則認為，政府訂立法例後，立法會有廿八日時間進行審議，一旦議會需要更多時間討論或者有異議時，可提出延展以延長審議時間。何認為民主派若不滿法例，亦可再延展以作討論，批評泛民議員「係又吠，唔係又吠」，言論引來隨後發言嘅議員尹兆堅不滿，質疑正在主持會議嘅代主席李慧琼執行議事規則嘅準則與梁君彥有別，又指何君堯「最賤」。
斥泛民「係又吠唔係又吠」
何隨即提出規程問題要求尹兆堅收回言論，尹解釋其「賤」字並非意指「賤格」，而是「貴賤」嘅「賤」，但李慧琼仍要求尹收回言論。尹不滿李未有對何早前嘅類似言論作裁決，李回應指當時未有議員提出規程問題要求佢裁決，議員許智峯隨即要求「扮主席」嘅李處理，但李指斥「扮主席」嘅形容違反議事規則。許收回相關言論後，李突然提出暫停會議。會議於約一小時後恢復，議案最終於分組點票下，獲得通過。
