政情：油尖旺花盆驚現大學站 民政署：唔知情
附有民政事務總署同油尖旺區議會標誌嘅9個大型石屎花盆，竟然跨區出現喺港鐵大學站對出嘅行人路。有區議員追蹤事情嘅來龍去脈，但作出回應嘅民政總署同港鐵皆表示不知情。到目前為止，呢幾個大型花盆嘅身世仍然係一個謎。
屬於油尖旺區嘅花盆點解會放置喺大學站外呢？民政總署回覆本報，話翻查紀錄後，冇資料顯示花盆屬於油尖旺民政處管有，或經由該區民政處安排放置到沙田，而花盆亦並非經由沙田民政處負責設置及管理保養，仲話唔知啲花盆係由幾時開始放置喺有關位置。本報記者日前再實地視察，發現花盆上嘅標誌亦已經被移除或者以橙色膠板遮蓋。
雖然民政總署指，花盆依家係由港鐵負責管理同保養。但係港鐵回覆查詢時，就否認嗰啲係港鐵嘅物品，解釋話有關位置毗鄰大學站，所以佢哋間中會派員協助修剪枝葉同清理喎。
區議員斥移除標誌如毀證
由9月開始就關注事件嘅油尖旺區議員李偉峰就話，成件事極為匪夷所思，質疑油尖旺民政處想將個波推畀港鐵就算，又批評移除花盆上嘅標誌猶如銷毀證據。佢話已提交文件要求喺今個月17號嘅地區設施管理委員會上討論事件，促該區民政處清楚交代購買及安置有關花盆嘅前因後果，否則會考慮去信申訴專員公署投訴。