政情：卸任區議員10個月 陳恒鑌始向立會申報
立法會設有議員個人利益登記冊，議員須根據《議事規則》第83條訂明嘅要求，交代特定類別嘅個人利益，包括有冇任職其他受薪工作，例如兼任區議員等等。本報記者就發現，去年底放棄連任荃灣區議員嘅立法會議員陳恒鑌（Ben），今個月初先至向立法會更新資料申報自己已經無再做區議員。到底係咩原因？
區議會早喺今年1月1日換屆，曾經喺荃灣楊屋道選區擔任16年區議員嘅Ben，當日就卸去區議員嘅職務。之不過，Ben遲至喺本月2日，亦即係相隔10個月之後，先向立法會更新自己已經終止從事荃灣區議會嘅工作。
強調期間冇涉薪金收入
根據《議事規則》第83（3）條，議員須於變更後14天內，向立法會秘書提供變更詳情。Ben就解釋，可能係因為助理之前未有時間處理，所以當日先連同其餘4份文件去更新，又強調今次遲咗更新並無分別，因為並冇牽涉任何薪金收入喎。