中環出更：投訴盜相不果 蘇錦樑Fb爆罵戰
各個社交平台都充斥唔少假帳號，有啲更會盜用他人相片做頭像，對當事人構成滋擾。商務及經濟發展局前局長蘇錦樑（Greg）前晚（13日）深夜就喺Facebook（Fb）上發文，話自己嘅相片經常遭到盜用，但向Fb投訴後不獲理會。Facebook香港、台灣及蒙古公共政策總監陳澍喺8分鐘後留言，強調並非漠視投訴，只係機器學習並唔完美，但就平息唔到Greg嘅不滿，兩人更喺貼文中爆發罵戰添！
陳澍先解釋，公眾人物喺網上有好多相，故難以百分百第一時間杜絕假帳號，仲叫Greg提供相關連結。之不過，Greg就質疑陳澍同Fb嘅態度好有問題，惹嚟陳反擊，話今時今日香港政府態度先係最有問題，仲話好彩Greg已經離開咗政府喎。
否認以名人自居 自稱小市民
Greg就重申自己唔係意氣用事，只係多次反映問題都冇改善，仲形容陳嘅態度顯示出Fb完全缺乏承擔。陳澍反駁，話自己喺凌晨非工作時間回覆，又質疑Greg係咪想用名人、前局長身份辦事，提醒佢為官一日，勿忘謙卑；Greg就否認以名人自居，重申自己只係小市民。
陳澍再提出透過私人訊息解決，兩人之後未有再公開留言回覆對方。雖然未知後事如何，但呢番爭論就吸引咗唔少網民食花生喇！