中環出更：栢志高就走 傳馮程掌西九醜鬥醜
西九文化區管理局行政總裁栢志高提早喺今個月底離任，管理局需向政府尋求借調人選做過渡安排。近月外界就盛傳曾捲入「樓換樓」醜聞嘅政策創新與統籌辦事處總監馮程淑儀，係出任署任行政總裁嘅大熱人選。之不過，有議員就擔心馮程淑儀會將政府管治思維帶入西九管理局，限制藝術自由發展。
其實類似馮程淑儀等級嘅政府首長被借調至西九早有先例，正如喺舊年8月初出任香港故宮文化博物館館長嘅吳志華，喺2018年時任康文署副署長嘅佢，亦曾被借調到故宮博物館出任館長，為期半年，所以令外界猜測馮程淑儀會唔會同樣最後「坐正」行政總裁一職。
議員憂思維限制藝術發展
公務員事務局回覆查詢時，只係引述西九管理局指即將進行全球招聘，物色行政總裁嘅繼任人選，並會向政府尋求借調人選作為過渡安排，局方又話政府正詳細考慮有關要求並作出合適安排，唔評論揣測性嘅報道。
一直關注西九管理局情況嘅議員鄺俊宇就認為管理局係獨立運作，成立初衷係為咗搞藝術同文化活動。佢強調藝術發展唔應該受到任何政治壓力，擔心作為公務員嘅馮程淑儀署任行政總裁後，將現屆政府嘅處事思維，例如「鍾意控制、乜都差隻腳埋去」帶入西九管理局，並大大限制西九嘅藝術發展。
假如馮程淑儀真係要接手西九管理局呢個燙手山芋，若果搞唔掂呢個爛攤子，會唔會又好似栢志高咁「被」提早離任呢？
卓妮