中環出更：難忘女排生涯 孫玥教學生拚搏精神
油尖旺社區體育計劃前日舉辦一場講述女子排球嘅電影分享會，中國女排隊前主攻手孫玥都有出席，佢話自己雖已退役多年，但女排精神仍銘記於心，仲勉勵現場300名中小學師生要有拚搏精神，唔好咁易放棄啊。
話說孫玥當年作為女排隊嘅隊員，都曾經畀中國女排最具代性人物、綽號「鐵榔頭」同「郎導」嘅郎平指導過。孫玥憶述最深刻嘅一場比賽，就係1996年亞特蘭大奧運會嗰場決戰古巴嘅賽事，雖然最後不敵對手，但孫玥話因為佢哋當時奮戰到最後一刻，所以郎導都有讚佢哋打得好，對得住女排精神。
今時今日，港人對體育嘅熱情好似冇咁強烈，但孫玥就覺得內地學生對體育項目比香港學生更專注，因為內地決定發展體育的話，就只會專攻體育同學業，好少會再涉獵其他才藝。相反港爸港媽就鍾意子女多才多藝，唔會單一玩體育。之但係孫玥都話，如果想鼓勵小朋友做多啲運動，最緊要都係家長身教，一齊做多啲運動。
賴以尊：港體育設施缺場地
至於贊助今次活動嘅王則翠慈善基金董事王家揚（Roland）就話，因為太太之前睇咗呢套戲，覺得好感動同鼓舞到人，所以Roland都想將訊息分享出去，教導依家嘅小朋友要迎難而上。
同場嘅嘉賓，香港高爾夫球總會行政總裁賴以尊就話，其實本港嘅體育設施都好完善，然而最大問題就係場地不足，譬如高爾夫球根本冇政府場地，依家要舉辦比賽都係有賴私人高爾夫球場願意免費借出場地，所以佢好希望政府容許佢哋喺水塘或內海灣練習，因為此舉既可節省土地又唔會污染環境，好讓佢哋易於推廣呢項運動。
卓妮