中環出更：慳電大戰落後 黑英賴個雪櫃

星星早前自豪分享家中每月電費只需一百二十元，但黑英亦唔輸蝕，話說佢同太太本來每人每日只用兩度電，當時已係城中難得咁環保，點知後來殺出星星呢個對手，聲稱每日只用「一度半」電，黑英立即出盡法寶追趕佢。由於家電之中最耗電嘅係冷氣機，所以唔係熱到爆，黑英都唔會開冷氣。

自備食物盒趨普遍

其次嘥電嘅係雪櫃，黑英大爆唔夠星星咁慳電，係因為星星最近換咗部新雪櫃，係眾多一級能源標籤中最慳電嘅，而佢嗰部就舊款啲，梗係唔夠新機咁好啦，不過，黑英就寸爆星星話，換新雪櫃即係要製造垃圾，所以佢用得就繼續用先係最環保喎。估唔到半度電都可以鬥餐飽。

中華廠商聯合會副會長吳永嘉（左）及泉昌董事副總經理黃楚恒（右）各有環保心得。

劉伯輝話旗下餐廳多咗食客自備食物盒購買外賣。

至於有關環境卓越大獎嘅評審準則，黑英就話環保一定要有系統持續進行，以及有員工配合，笑言可以準時收工嘅機構就係最環保，準時熄燈同電器，員工心情好啲，工作自然有效率。得獎機構銀龍集團行政總裁劉伯輝就話，開心見到多咗住宅區嘅食客自備食物盒購買外賣，而佢哋每日嘅晚飯餐單亦盡用當日食材，減少廚餘。

卓妮