中環出更：泛民拉布狂點人數 延任會期第3次流會
泛民主派喺立法會內拉布可謂家常便飯，嚟到新一立法年度更變本加厲，尋日立法會大會就因點人數，而導致10月復會以來第3次流會。立法會主席梁君彥慨嘆話，點人數同流會令會議無法暢順進行，又指班議員嘅軀體同靈魂都未必喺議事廳，所以原定晚上7點完結嘅會議，提早半小時休會。
下午2點左右，當時會議正由議員何君堯讀出第5題口頭質詢，但何嘅發言遭到民主黨許智峯要求點人數而打斷。點完人數之後何君堯繼續發言，代主席李慧琼呼籲泛民主派議員唔好喺其他議員發言期間要求點人數，儘管民主黨林卓廷不滿何君堯提出重讀質詢問題嘅要求，但李就行使酌情權畀何發言完畢先至點人數，惹來許智峯質疑此舉有違《基本法》。後來在席議員因尚欠一人，未符法定人數而流會。建制派議員柯創盛同邵家輝雖趕赴會議廳湊人數，然而兩人步入會議廳，已經過咗點人數時限。
梁君彥：議員靈魂不在議事廳
梁君彥喺宣布休會前，就話會議超過7個鐘，但點人數接近3個鐘，流會又用咗個幾鐘，令到會議無法暢順進行，仲話議員嘅軀體同靈魂未必喺議事廳，所以提早休會畀大家休息，期望今日會議可暢順進行。尋日立法會大會總共點咗12次人數，合共耗時2小時36分鐘。
卓妮