政情：鄭若驊表現曳 民望再墊司底

聶德權成跌幅最大局長

香港研究協會於上月27日至本月3日期間，成功訪問1,072名18歲或以上市民對現屆政府嘅滿意度。調查結果發現，受訪市民對特首同3名司長嘅滿意度評分均有所回落，特首林鄭月娥同政務司司長張建宗均跌0.06分，同為4人當中跌幅最大嘅官員；鄭若驊亦跌0.05分，僅得1.67分，喺一眾問責官員中，鄭得分之低繼續「包尾」。

喺13名局長方面，調查結果顯示有6人嘅滿意度評分錄得下跌，其中被指抗疫工作不力、推行措施混亂嘅食物及衞生局局長陳肇始跌0.02分，排名由上次調查嘅第3位跌至第6位，係佢上任以來首次跌出局長排名首5位。講到跌幅最大，就係公務員事務局局長聶德權，佢嘅評分下跌0.11分至1.91分，而教育局局長楊潤雄評分亦跌0.07分，僅得1.82分，評分排喺問責局長榜末。

最多受訪者唔識薛永恒

調查結果同時發現，最多受訪者表示唔認識嘅係創新及科技局局長薛永恒，緊隨其後嘅係財經事務及庫務局局長許正宇同發展局局長黃偉綸；3人當中，只有黃唔係喺今年4月政府改組時新上任。受訪者亦對政府施政表現不滿，9項評分項目中6項錄得下跌，當中最不滿政府未能紓緩房屋問題，僅得1.83分。

針對鄭若驊民望長期「墊司底」，理工大學專業及持續教育學院講師陳偉強分析，主要係因為近期一連串關於司法界嘅事件，令市民對法治感到失望所致。佢舉例，如最近有法官放生去年8‧31灣仔暴動案餘下7名被告，但律政司卻未有行使其上訴嘅權利；又例如有檢控官連基本嘅控罪內容都寫錯，同埋壹傳媒黎智英等涉違《港區國安法》嘅案件等，令人感到「雷聲大、雨點小」。

學者轟律政司缺行動力

陳又炮轟上述種種事件反映律政司內部缺乏行動力，喺監管下屬方面亦相當不力，導致近期律政司嘅「甩轆」事件時有發生。陳又狠斥鄭作為律政司的最高領導人，卻縱容「有錯唔罰」的風氣，直指鄭難辭其咎，應該問責下台。