政情：港府唔敢轉軚葉劉變「反對派」

話說政府接連推出三輪防疫抗疫基金救市後，財政儲備大縮水，而財政赤字亦大幅飆升，所以近日就有政府中人放風試水溫，話有行會成員反對放寬兩元乘車優惠門檻，點知個個聽到都即刻（興）到火滾，各黨派議員仲喺前日嘅內務委員會同財務委員會會議上，炮轟政府若撤回有關計劃就係「政治災難」。呢啲令政黨攞分嘅民生議題，公布咗就好難收得番，想縮沙都好難，況且使嘅錢唔多，比起政府浪費嗰啲納稅人冤枉錢，真係九牛一毛，各界唔鬧爆政府先至奇。

考慮以個人取代長者八達通

勞工及福利局局長羅致光尋日出席電台節目時就解畫，澄清政府並冇擱置或煞停計劃，政府嘅目標仍然想喺下個財政年度落實，但就未有確實時間表。佢仲透露其中一個方向，係以個人八達通取代長者八達通，由於現時本地六十歲至六十四歲人口約有五十九萬人，預計需發放同樣數目的個人八達通，需要時間處理及調整系統。

至於日前批評政府想煞停計劃就應該公開解釋原因、而唔係靠放風嘅行政會議成員葉劉淑儀（葉劉）就唱反調，企硬反對放寬門檻。葉劉尋日再喺社交網站轉發自己製作嘅影片解釋反對原因，指擔心會出現濫用、濫發嘅情況，又認為交通費都會隨通脹上升，最終只會變成用公帑補貼公共交通公司，長遠只會增加財政負擔。

葉劉話，現時經濟情況已經同當初公布計劃時唔同，加上財赤前所未見，一旦出現結構性赤字就「好有問題」；佢仲搬出《基本法》第一百○七條，指政府嘅財政預算應以「量入為出」原則辦事。她又認為，若有人就此提出司法覆核，恐怕「好難成功」。

政府弱勢 行會成員頻「對着幹」

其實行會成員作為政府嘅智囊，應該跟貼政府立場，但近日就有唔同嘅行會成員出嚟放風，甚至唱反調，當自己係局外人咁批評政府，搞到市民都覺得訊息混亂，難怪政府愈做愈弱勢喇，倒不如閂埋門傾掂先出嚟講啦！