中環出更：徐英偉否認晤區議員嘻皮笑臉
話說今屆由民主派揸莊嘅區議會同政府關係麻麻，民政事務局局長徐英偉（Caspar）有意想藉喺月初同區議會正、副主席會面嘅機會破冰，點知關係不但冇好到，仲畀對方話嘻皮笑臉冇誠意添。Caspar日前喺一個網上訪談節目，再度死撐話冇件咁嘅事，解釋「唔通嬲爆爆咁會面咩」，又話自己笑口噬噬皆因想表達「善意」，直指如果咁都有人覺得唔莊重，只能話大家標準唔同喎。
斥區會效率低 暗示或各行各路
Caspar仲乘機暗寸班區議員喺會後圍堵佢，又話相信依家好多民政事務專員都會遇到類似事情。而佢都有多次警告，議會係文明溝通、有規有矩嘅地方，指任何威脅、恐嚇同禁錮嘅行為都係唔應該，又指公務員都係跟規矩做嘢，成日咁對佢班下屬真係過咗界。
Caspar又批評今屆區議會效率低，又透露好多文化、體育等地區推廣項目，都唔一定要經區議會做，政府仲可以用其他途徑去做咁話。照咁講法，唔知佢係咪經過會面一役後都對區議會死心，想預告定分手宣言，之後各行各路呢？
卓妮