中環出更：梁慧珊籲調整身心 疫境冇有怕
喺全球疫情都不明朗嘅氣氛下，唔單止影響日常生活，去唔到旅行，仲成日要困喺屋企，就連情緒都會有波動，咁點先可以喺呢段時間保持住一個最佳狀態呢？
前幾日下晝喺中環Ifc見到獅子山青年商會領袖才能發展董事梁慧珊，當時佢一個人喺時裝店睇衫，之後就入咗超市買水果。離開時，卓妮同佢打招呼，問佢係咪放假？佢就話啱啱做完嘢所以買啲水果食。咁好健康喎？佢話唔止要挑選有營養嘅食材，仲要加埋適量運動先夠o架！唔怪得之見親佢都咁精神啦！佢仲話喺呢個不明朗嘅環境之下，更加要畀自己有健康嘅身體，心態上亦很重要，要有明確嘅方向，無論環境順逆，都要調節好自己，千祈唔好氣餒。
梁高美懿：趁機自我增值
卓妮早前喺另一個活動上遇見香港銀行業首位女大班梁高美懿同丈夫。問到梁太呢段時間點樣可以保持最好狀態，佢就話狀態時時都要keep住，首要一定保持身體健康，因為你冇好嘅健康講乜都冇用，仲有就係趁呢段時間多咗，可以自我增值，學習唔同嘅新事物，仲要睇多啲新聞了解時事，因為疫情喺全世界都發生，一定要掌握資訊唔好畀自己脫節。
前兩日問到議員梁志祥點樣喺呢段時間keep住自己嘅狀態，佢話自己唔鍾意望天打卦，會定時去釣魚同行吓山，疫情放緩就會約一兩個朋友一齊食飯，由於自己住喺郊區，有時出去兜個圈頭腦都醒啲，遇到困難都好容易想到辦法去解決。佢仲話就算冇嘢做都唔好成日喺屋企呆坐，咁樣會好容易影響情緒，好容易變大肥佬對身體都唔好啦！
卓妮