政情：海洋公園引入瑜伽 陳智遠寸爆：以為惡搞
本港疫情近日漸趨緩和，早前獲政府注資救亡嘅海洋公園有望喺短期內重開，並計劃容許入場人士喺園內露營同做瑜伽。曾任食物及衞生局政治助理、依家主力發展深度遊業務嘅陳智遠（Paul），尋日話自己睇到有關報道後，一度以為只係畀網民惡搞，又笑言公園可以再做盡啲，以「廢墟」為主題可能會大受歡迎添！
政府早前向陷入財困嘅海洋公園注資五十四億元，並承諾會將公園重新定位，但受疫情影響，早前更換董事局主席嘅海洋公園需要暫停開放。當局早前預告，最快會喺本周五撤銷主題公園嘅社交距離限制，海洋公園日前就宣布將推出「森度遊」，活動包括喺公園範圍內做瑜伽同露營。
提議擺到爛做廢墟主題
之不過，過去曾多次鬧爆政府旅遊政策不思進取、批評海洋公園管理層懶懶閒嘅Paul就喺Facebook發貼文，語帶玩味咁話，若果將啲機動遊戲園區變成廢墟，由得佢哋生銹，假以時日一定大受歡迎，仲形容切爾諾貝爾（烏克蘭核電廠）都係咁樣紅添！