政情：返內地要隔離 許華傑靠網購度日
雖然本港疫情近日有所放緩，但依家喺香港入境內地仍然限制多多，唔單止要出示病毒檢測呈陰性嘅證明，入境後亦需要喺指定酒店隔離檢疫十四日。
香港中華出入口商會副會長許華傑（Michael）近日就返咗內地，佢尋日喺Facebook上貼文，話喺隔離檢疫期間，每日都要上報兩次體溫，仲分享咗喺酒店等候嘅期間，佢喺網上買咗好多嘢添呀！
Michael上星期五就喺深圳灣口岸過關，當時過境人數唔多，所以過程非常之快，由過關到上大巴去酒店，前後只係用咗大概一個鐘頭，之後佢形容自己「開啟隔離十四天倒數模式」。
讚快遞有效率 即日交收
尋日踏入隔離檢疫第三日嘅Michael就分享，話酒店派發嘅屬傳统溫度計，所以佢都唔係好識得點樣睇讀數。之但係，仲要喺酒店困多十日，有乜嘢搞作呢？佢就話網購咗酸奶、水果、咖啡同瑜伽墊，仲話內地嘅快遞好有效率，上晝落單下晝就送到添！