政情：黃碧雲戀棧議席 遭抗爭派狙擊

在意去留 黃之鋒嘲不配擁有

事緣涂謹申、議會陣線議員朱凱廸同「抗爭派」鄒家成，日前陪同喺內地被扣押嘅十二名港人嘅家屬召開記者會，希望港府提供協助，事後涂就喺Fb貼文重申家屬訴求。點知一舊雲竟然喺涂貼文下留言話：「朱（凱廸）議員如果撤退，就不能再用議員身份幫手足家屬。民主派議員若總辭，難道叫家屬去搵保皇黨議員？」隨即被網友狠批呢個時候就只關心自己個去留問題，更引來「抗爭派」鄒家成留言反問：「請問鄒家成有冇議席？」

涂謹申見勢色唔對，之後亦刪除相關貼文。可惜一切都太遲，戰場更伸延到Instagram。前香港眾志秘書長黃之鋒喺限時動態貼出一舊雲嘅留言截圖，並加上電影《蜘蛛俠》經典對白：「If you're nothing without the suit, then you shouldn't have it.」（如果你脫下戰衣就甚麼都不是，那你根本不配擁有它），暗寸對方係咪冇咗議席，就覺得自己乜都做唔到。

一舊雲尋日終於知衰喺Fb發表道歉聲明，話明白將兩件事扣連或混為一談並唔恰當，可能會令被扣押港人及其家屬感到冒犯及不安，所以決定收回有關言論，並向家屬致深切問候，希望對方接受佢「摯誠的道歉」。

胡志偉急補鑊 網民直斥垃圾

最後件事難收科，仲要出動到民主黨喺Fb貼文回應事件同道歉，話對於一舊雲喺社交媒體嘅不當言論，該黨主席胡志偉「謹此代表民主黨向被扣押人士及家屬致歉」。不過道咗歉唔係人人受落，兩個貼文嘅留言區依然惹來一片罵聲。唔少網民唔接受道歉，質疑佢戀棧議席，有網民直斥係垃圾，要求佢同民主黨議員辭職。

話時話，泛民喺下周一就會進行有關立法會去留嘅民意調查，一舊雲喺呢個敏感時刻失言，泛民隨時畀呢個「豬隊友」拖累，難怪胡志偉要急急衝出嚟補鑊喇！