政情：梁美芬斥教局唔踢唔檢查 通識課本亂衰毒
通識科一直被指問題多多、急需改革。議員梁美芬（Priscilla）就透過社交平台嘅直播，指通識科一直都係「亂、衰、毒」，唔少議員同教育局反映咗十幾年，教育局先郁一郁，話通識科未改革完，需要逐本書檢查添！
轟美化違法行為
Priscilla話唔少通識科教科書美化違法行為，甚至宣揚公民抗命，佢點名批評違法佔領行動（佔中）發起人之一、港大法律系前副教授戴耀廷宣揚違法達義，仲話戴亂講香港實行三權分立，質疑戴冇讀過政治學添。佢批評違法達義係政治歪理，反問點解犯法可以唔受罰，話課本應清楚講明參與違法行為需要承擔相應法律責任，先可以正確宣揚法治精神囉咁話。
唔單止咁，Priscilla直播後嫌未鬧夠，隨即又上載新嘅影片繼續狠批通識科，直斥過去嘅通識科教科書「亂、衰、毒」之餘，仲要好深，質疑中學生好難明白當中嘅內容。佢批評教育局一直提倡所謂嘅教學自由，而冇審視課本，仲話若非議員逼住教育局，局方真係唔會點郁囉！