政情：打晒開口牌「棄守」諗清楚 白鴿黨借民調撐延任

日前喺民主派發表完聲明後，網上隨即有唔少人爭論去留問題，當中有人就建議透過民意調查嚟決定去向。尋日白鴿黨主席胡志偉就話，該黨早前傾向延任，以維持議會戰線，認為有能力拖延「惡法」、甚至督促公帑運用，如「明日大嶼」撥款等，但同時佢又話，仍希望市民參與有關決定，將根據民意取向、以機構結論作為依歸。

同屬白鴿黨嘅議員林卓廷就話，佢哋會服膺民調結果，而結果亦將作為該黨決定去或留嘅基礎，又指近日民主陣營因去留問題出現裂痕，破壞咗過去一年嘅努力與團結，認為冇絲毫空間讓裂痕擴大。佢又話，希望可以舉行最少一場嘅辯論，等市民可以掌握去留雙方嘅理據，明白棄守立會嘅嚴重性。至於辯論嘅詳情，佢就話仍需要時間籌備。

楊岳橋支持 留守可篤眼篤鼻

一樣話傾向延任嘅公民黨尋日就話，考慮到未來一年已超出民意授權範圍，所以決定跟從白鴿黨嘅民調做決定。被取消參選資格（DQ）嘅議員楊岳橋就話，自己已經被DQ，相信自己若可留在議會，會令政府覺得「篤眼篤鼻」，有一定作用，又話民主運動三大戰線中，希望可以把握僅餘嘅議會戰線。

陳志全反駁：集體杯葛非逃避

早前表明支持集體杯葛、自稱非「主留派」議員陳志全就話，林卓廷在記者會上指投票支持杯葛屬「棄守」，對於「棄守」兩字感到反感，認為集體杯葛都係戰術一種，並非放棄和逃避。佢又認為，要有戰意和抗爭意志才有留守價值，如有人支持留守議會戰線，建議應要反問支持留守嘅人有冇足夠戰意。

另外會計界議員梁繼昌最近就搵咗約千五名會計師做民調，截至前日嘅結果顯示，約五成二會計界選民同意梁接受延任安排、四成二不同意、約百分之五選民持中立意見。佢就話會繼續與業界保持溝通，並嘗試與其他民主派議員尋求共識。

對於延任與否，其實民主派內部本身都各自有諗法，依家先嚟話睇民意去做決定，似乎係想藉民意去支持延任，不過呢啲「民調」喺打晒開口牌下進行，個可信性又有幾高呢？