政情：區會限一周一會 焗住轉去鄉公所

民政事務總署以防疫為由，規定區議會每星期只可以舉行一次會議且以兩小時為限。西貢區議會尋日召開社區營造及社會創新委員會，要另覓地方去鄉公所開會。主席鍾錦麟批評民政總署做法邏輯上係講唔通，而且係單方面做決定，指禁聚令豁免區議會開會，但又唔提供支援。

鍾錦麟話每星期兩個鐘會議絕對唔足夠，而一直延遲會議，只會令議程積壓，阻礙民生防疫措施。至於昨日到鄉公所開會，因欠缺秘書處服務，議員傾到一啲唔明白嘅地方，都冇得搵有關官員即場解釋，另外要依靠區議員自行物色開會嘅地方，亦感到較為吃力。鍾話疫情將成為新常態，之前已經向有關方面建議採用視像會議，但一直冇進展。元朗區議會昨日舉行醫委會面對同樣問題，需要搬去議員辦事處開會。鍾錦麟話早前已有區議員向署長反映意見，但形容得到回應係「Hea覆」。