中環出更：居家工作失聯 公僕蛇王捱轟
因應疫情持續，政府多次宣布部分公務員居家工作。不過，有議員接到市民投訴，大部分政府部門因居家工作而失聯，質疑有人借疫情「蛇王」，更點名社會福利署情況最嚴重，表明會去信公務員事務局局長聶德權要求正視「吞Pop」（偷懶）問題。
議員鄭松泰喺Facebook上指，最近收到好多市民投訴，指大部分政府部門以「WFH（Work from home）」之名失去聯絡，仲舉例指日前懸掛九號風球之時，民政事務總署遲遲未能安排臨時庇護中心。佢喺信中仲提到部分個案，包括有市民投訴話冇辦法聯絡社署，就緊急家庭輔導方面尋求協助；又有人投訴喺運輸署牌照科等咗幾個月，都冇人處理相關申請，甚至冇回覆同埋聯絡添。
社署最嚴重 議員促正視
疫情下嘅公務員工作安排，係除咗提供緊急及必須公共服務嘅人員外，其他都要居家工作，換言之唔少部門嘅員工都毋須到辦公室當值。鄭松泰就點名，直斥社署嘅問題最嚴重，但民政事務總署及房屋署就還可以，話最少都搵到人喎。佢仲話，理解公共服務效率會因疫情而受影響，不過就愈嚟愈多市民嘅日常生活都因此受困擾，所以先去信關注，希望當局可以督促啲部門，妥善安排人手咁話喎。
卓妮