中環出更：疫下田園樂 侯志強魚塘游水捉魚
疫情期間要避免人群聚集，但又想到戶外舒展一下，應該點呢？上水鄉事委員會主席侯志強就選擇享受田園生活喇，得閒就種吓菜、落水捉吓魚，有時仲會親自下廚，煮番兩餐添！
侯志強話呢排疫情嚴峻，冇乜必要都唔會去人多嘅地方，所以就決定得閒落田種菜或者去魚塘捉魚，話享受吓生活之餘仲可以減肥喎。而佢前幾日仲捉咗幾條魚，返到屋企即刻煲魚湯畀孫仔飲，話疫情留喺屋企都幾開心，冇咁忙之餘，仲可以享受家庭樂喎。咁啱近排天氣炎熱，但康樂及文化事務署轄下嘅泳池冇開，侯志強就話走去魚塘嘅時候唔一定淨係捉魚，仲會喺魚塘游埋水先返屋企喎。
龐愛蘭花盆種番薯
香港藥學會會長龐愛蘭（Scarlett）都好喜歡田園生活，日前佢就去到元朗一個非政府組織租用嘅有機農田，幫手採摘蔬果。Scarlett話唔落農藥嘅有機種植，其農產品不但安全且特別可口，但缺點係好大機會惹來蟲害，所以大部分果實都需要用網或者膠袋包住，咁先至可以避免「失收」。雖然蟲害係可以避免，不過野豬就防不勝防，因此有機農田並無種植番薯，以免野豬夜闖一掃光。Scarlett話自己會喺屋企嘅花盆種植日本番薯，咁就隨時都可以大快朵頤。除此之外，佢又有種植香茅、田七等植物。
農作物要崇尚天然就唔應該落農藥，但為保「收成期」，有時施加農藥屬無可避免。半島東扶輪社創社社長洪文正（Alex）因為嗜辣，所以除咗觀賞性植物，亦會喺家中種植辣椒仔。Alex話唔好以為勁辣嘅辣椒仔會令到害蟲退避三舍，佢話試過花一番心血所種植嘅辣椒仔，可以一夜之間畀害蟲啃清光！但幸好入夜前佢已經摘取咗小部分收成，否則的話真係渣都冇呀！
卓妮