政情：公民講場：郵件包裹積壓 朱曼鈴束手無策

因疫情關係，香港郵政近來削減每星期嘅郵件派遞次數，不過收件嘅數量就未見減少，結果就導致積壓喺郵件中心嘅信件同小包裹堆積如山，經常都出現郵件未能及時派遞嘅情況，唔少巿民收到水費單之時，繳款期限己過，亦有加急特快嘅包裹延遲超過一個禮拜先至送達收件人手上。面對一日多過一日嘅郵件，香港郵政嘅員工當然好頭痛，香港郵政署長朱曼鈴應該聽吓員工方面嘅意見，暫停派遞宣傳及廣告單張以紓緩目前嘅郵政壓力，否則亂晒大龍嘅郵政亂象，唔知幾時至可以解決喇。