- on.cc 東網主頁
- 3月28日 (五)
近年公職人員嘅住所或名下物業，被揭發違反建築工程（俗稱僭建），可謂時有所聞，惹來多位議員關注，認為會影響公職人員嘅信譽。議員葛珮帆批評議員毛孟靜將車房改建成住宅，僭建超過十年，政府當局並無要求毛拆卸，質疑政府執法出現偏頗，對社會造成極壞影響，令人誤會社會上有部分人士係有不用守法嘅特權。
發展局局長黃偉綸尋日喺立法會回應指，毛屬單一個案難以評論，相信政府人員係以不偏不倚嘅原則處理個案，需要時會諮詢相關法律意見。黃又重申，不論任何身份，業主都有責任遵守樓宇安全嘅規例，強調政府將按有關法例，一視同仁處理個案，不會因涉事人嘅公職身份而額外處理。
建築、測量及都市規劃界議員謝偉銓則關注，政府處理僭建人手是否足夠，每年能夠處理幾多僭建案件。黃承認人手緊張，現時共有七百位職員，已較三年前增加兩成，每年可處理超過一萬宗案件。佢又指政府暫時無計劃成立由屋宇署、地政總署、香港消防處及差餉物業估價署等政府部門代表組成嘅跨部門專責小組，認為本身各部門嘅工作已屬行之有效。
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
