中環出更：用家安心 林曉盈自行研製防疫產品
突如其來嘅疫情雖令環球經濟大受衝擊，不過素有「手套女王」之稱嘅香港青年工業家協會執行委員林曉盈（Juliana），就無懼不景嘅市道，開拓生產消毒同防疫用品嘅新業務。佢話逆市之下重金投資喺另一門生意，除咗心口掛個「勇」字，早前嘅口罩荒亦對佢有有所啟發。
話說疫情爆發之初，Juliana受朋友委託四出搜購口罩同消毒產品，然而喺物色產品嘅過程中，佢擔心所購之物是否合用之餘，更發現市面唔少防疫產品同ESG理念（環境、社會與治理）背道而馳，於是佢就萌生自行生產嘅構想，咁就可以確保產品可以保護家人同朋友，又可以製造就業機會。Juliana話有賴爸爸打下嘅工業基石，以及公司研發團隊嘅努力，今次推出嘅消毒同防護用品不但得到權威機構嘅認證，其相宜嘅售價，應該喺市面上好有競爭力咁話。
戴麟有意生產「開心」口罩
Juliana宣布推出新產品，除咗父母同哥哥林思聰親自去撐場，全城街馬聯合創辦人及董事魏華星、香港青年工業家協會副會長戴麟（Paul）都有到場恭賀。經營衣架業務嘅Paul話經過三月份業績銳挫後，踏入五月之後生意漸見起色，不過就好難回復昔日嘅生意額。由於全球對醫療同防疫產品嘅需求龐大，Paul亦有意生產口罩。佢話依家嘅口罩令人感覺好唔開心，因此要增加設計元素，講求功能性同舒適性兼備，希望令大家戴口罩都開心啲。
至於香港青年工業家協會當然顧問冼雅恩（Benedict），亦大嘆近來生意淡薄。儘管疫情之下網購大行其道，但從事珠寶業嘅Benedict指，線上銷售只適合廉價首飾，一講到貴重嘅買賣，還是面對面最好，畢竟貴價嘅珠寶玉石若非親手接觸，難以促成交易，所以展覽會乃一大生意渠道。但依家啲展覽會唔係取消就係延期，佢話最快嗰場都要等到十一月。
卓妮